以前做別人的女兒，經常都嫌媽媽嘮叨，常叮囑自己要作息定時、少捱夜多休息、多注意飲食，唔好捱殘，如果唔係老左身體就會變差，點補都無用架啦！左耳入右耳出，自從自己做了媽媽之後，就發現原來媽媽講嘅野真係好啱，真係好對唔住，原諒我無聽你話！隨住生完小蛋黃後，年紀又大左啦，身體上真係好多野大不如前，好易就精神差，FEEL到新陳代謝慢左好多，加上半夜湊B瞓得少，睡眠質素相對差左好多，每晚都要留意BB有無咩異樣，想瞓「淋啲」都唔得！想好似「做女」咁大覺瞓，瞓到自然醒簡直係奢想，每日都覺得自己似行屍走肉咁XD不過踏入2018年，我應承過自己要的起心肝調理好返身體，因為我要有強健體魄先可以照顧好爸媽、老公同小蛋黃！除左飲食方面，比以前注意左健康，早前亦都學人試下做日韓台好流行嘅「暖宮」SPA，哈哈！唔知係咩？佢可以調理我哋身體，好多人試過都話好正好舒服，最重要係⋯「坐喺度咩都唔駛做」就可以調理身體，仲可以揀「生B！瘦身！」，係咪好勁先？！等我即刻同大家介紹下先！
今次我去嘅《祝你好孕》位於荔枝角「香工」，大家可能好好奇「香工」明明賣衫就多JE，工廠大廈做SPA？環境會唔會好差㗎，會唔會唔衛生？呢個疑問都一直存喺我個心嗰度，直到上到去，完全令我改觀！一出電梯門口，就見到一個好清晰嘅門牌！我即刻覺得自己好似大鄉里出省咁呀！
入到去嘅時候，雖然店仔細細但幾骨子架！裝修有少少似泰式嘅感覺，唔會令人覺得好拘謹，令我覺得好RELAX。
稍為安頓好，治療師就俾左一份FORM我填，入面除左填番個人資料之外，仲要做同身體健康程度有關嘅問卷調查。然後治療師就會詳細介紹佢哋提供嘅日本座薰藥劑：主要分3大功效，淨化排毒，改善婦科病及美肌減壓，成份主要有陳皮、益母草、艾草等20多種中草藥組成，再按不同功效需要加入高麗人蔘、當歸等名貴藥材。
簡單介紹3大功效！
粉紅色：女性調理，改善婦科病
促進子宮保暖，改善虛弱怕冷體質；對陰道縮小，不孕症，更年期症狀，月經不順經痛，子宮內膜症，膀胱炎，尿失禁，分娩後產生良好效果。
綠色：淨化排毒
促進血液循環及細胞的新陳代謝，從而排清毒素，改善腸道敏感幫助營養品吸收。
紫色：燒脂、治鼻敏感同有美肌減壓功效
讓皮膚去除體內廢物, 改善皮膚性質強化彈力, 舒緩肌肉，放鬆身體；讓脂肪燃燒，對减肥起作用及對過敏性鼻炎，花粉症，慢性便秘，解除壓抑有效果。
哈哈！大家估下我最想做啲乜？想生BB？NONO啦！
我想要排毒瘦身啊～ 自從生完BB之後，新陳代謝好似慢左好多，瞓得唔好、腸胃又好差，經常都痾水啊！同埋生完小朋友，身體都可能積左好多毒素，希望透過今次座薰可以改善到問題，最好就係連水腫都搞掂埋就最PERFECT啦！
揀完藥劑之後呢就同大家介紹今次主角啦！
呢一個好似馬桶XD嘅野，就係俾我哋坐上去嘅座薰嚟架啦！
其實座薰原理係透過從陰道或肛門的粘膜吸收蒸氣中的藥草，
令子宮得到温暖，增加受孕機會及改善手腳冰冷的情況，
同時改善生理痛，產後虛弱及更年期不適。
更可令體內脂肪下降及令肌膚回復最好的狀態。
嘩～係咪覺得好勁呢！
就咁睇個座浴器已經覺得好有份量！
當下面煲起藥草時，熱力就會從下而上蒸上去，
好有趣呢！
公開座薰小空間俾大家睇啦！
一陣整個艾草座薰過程都會喺呢個私人小空間發生，
因為真係要全裸㗎所以一定要確保空間夠私隱！
除左要夠私隱外，大家見到左手邊個架嗎？
呢個架，入面裝滿住治療師嘅細心！
哈哈，等我偷偷話俾大家知裝左D咩啦！
先有自家製嘅泰國草球提供（可以即刻買走返屋企架XD），
可以增加血液循環，緩和肌肉緊張，減輕關節痛楚及達致減壓的效果。
等我哋一邊蒸一邊按摩塊面或者身體都得！二話不說，即刻試碌上面XD
中間果層就有一件座薰專用的袍，係好SWEET嘅粉紅色架！啱曬女仔用！
最低一層你就會發現佢準備左充電器俾客人，非常貼心呢！
驚我哋喺等待嘅過程係咁撳電話，搞到電話冇曬電，
有充電器就唔怕啦！
最後，加多一本旅遊書藉就PERFECT晒，
真係無微不至！好啦！講左咁耐，係時候開始做啦！我去換衫啦！
登登登登！我換好啦！
（我果日真係好水腫！塊面好似浮屍咁！）
好想可以快啲蒸啊！
治療師正式幫我倒入熱水＋藥草
坐大約40分鐘左右！
因為蒸嘅時候呢我都唔方便影相⋯
但都可以同大家分享蒸嘅時候要注意同有咩感覺，
大家記得一定要盡量坐後少少個人啦，
盡量令陰道位置可以俾藥劑蒸氣接觸得到，
咁先至有效！
不過，其實全個過程啦都冇乜特別感覺㗎，
只係"妹妹"位置係蒸嘅時候會覺得有少少暖，
藥劑蒸氣包圍住全身，都幾舒服架！
但絕對唔係流到全個身都係汗果隻SPA！
為左去水腫、排毒，我要努力蒸！再一邊努力碌個面！
WOW！真係話咁快就蒸完啦！
有無覺得我好似無咁腫XD⋯應該無咁快！
大多數係自我感覺良好關係！
不如俾大家睇下蒸完之後會有啲乜嘢見到啦！
治療師話Nic蒸完之後，見到個壺入面的水比較清澈，整體嚟講身體情況都算OK，薰完之後唔好即刻沖涼住，當晚便便的情況應該會有所改善，同暢順左，應該都會痾到啲靚便便！
相反，另一位朋友就見到佢壺水表面有一層油、好似好混濁咁，反映到身體情況差好多啦！要再努力D調理身體喇。
最後，換好衫整理好儀容後，治療師仲會奉上一碗糖水俾我哋，真係好SWEET啊！NIC真係無諗過做座薰都會有糖水吃！加分啊！最後最後，治療師更提醒NIC除左可以靠做座薰一步步調理好身體之外，因為我脾虛的關係，要改善腸胃差嘅情況，建議Nic可以戒食生果，唔好食一啲有太多汁的生果，如果真係要食，就可以揀藍莓啦～無咁寒涼！WOW！感覺自己去做韓國漢方艾草座薰，仲可以睇埋中醫，真係好正啊～同埋返到屋企，果一晚真係好瞓左，睡眠質素有改善到！係幾驚 喜！另外，我都建議一啲想生BB的朋友或子宮有問題、月經不順的朋友都可以去試下！感覺這種方法係天然MILD一啲，點都好過亂試其他野！
順帶一提啦～因為果度同一時間可以一次過做3個座薰架，大家可以約埋一班閨蜜一齊去試下，而且價錢屬中等，3個人己經係包場，又或者可以帶埋小朋友上去，有個小PLAYGROUP俾小朋友玩，媽媽們就可以帶埋小朋友過來，一邊安心做座薰啦！
祝你好孕SPA養生館
地址：荔枝角青山道481-491號香港工業中心A座4樓9B室
WEBSITE：https://www.proudtobepregnant.net/
#療程及資料由祝你好孕SPA養生館提供。
❤EMAIL❤
❤IG❤
❤FACEBOOK FANSPAGE❤
